विनोद निता कंण्डेल आँखा अस्पतालमा एक वर्षमा ५३ हजारभन्दा बढीको आँखाको परीक्षण

नवलपरासी ।पश्चिम नवलपरासीको सदरमुकाम परासीमा रहेको नेपाल नेत्रज्योति संघअन्तर्गत रहेको डा. विनोद निता कंण्डेल आँखा अस्पतालले एक वर्षको अवधिमा ५३ हजारभन्दा बढीको आँखाको जाँच गरेको छ ।

अस्पतालका अनुसार आर्थिक वर्ष २०८१\०८२ मा नियमित ओपिडी सेवा, विभिन्न उपकेन्द्र, विद्यार्थी आँखा जाँच कार्यक्रम र शिविरमार्फत ५३ हजार ६६६ जनाको आँखाको परीक्षण गरिएको हो।

गतवर्ष मात्रै अस्पतालमार्फत ३७ हजार ६ सय ३२ जना सेवाग्राहीले ओपिडीबाट सेवा लिएका छन् । यसबाहेक अस्पताल अन्तर्गत सञ्चालित चारवटा उपकेन्द्रहरू (सुनवल, सरावल, प्रतापपुर र सुस्ता) मार्फत २ हजार ६२९ जनाले सेवा लिएका छन् ।

यस्तै, विभिन्न स्थानमा सञ्चालित निःशुल्क शिविरहरूबाट ५ हजार ५८८ जनाको आँखाको परीक्षण गरिनुका साथै १ हजार ४ सय जनाको मोतियाबिन्दुको शल्यक्रिया गरिएको अस्पतालले जनाएको छ ।

विद्यालय केन्द्रित विद्यार्थी आँखा जाँच कार्यक्रम अन्तर्गत ७ हजार ३४६ जना विद्यार्थीको आँखा परीक्षण गरिएको छ, भने परीक्षणपछि ३७० जना विद्यार्थीलाई निःशुल्क चश्मा वितरण गरिएको वरिष्ठ नेत्र साहायक एवं बाह्रय कार्यक्रम संयोजक राधिका यादवले जानकारी दिनुभयो ।

अस्पतालमार्फत १ हजार ४८९ जनाको मेजर शल्यक्रिया र ६७ जनाको माइनर शल्यक्रिया समेत गरिएको बताइएको छ ।

स्थानीय तहसँगको सहकार्यमा अस्पतालले सम्झौता गरेका पालिकाहरूका ४७१ जना नागरिकलाई निःशुल्क सेवा प्रदान गरेको छ । तीमध्ये सरावल गाउँपालिकाबाट १०३ जना, रामग्राम नगरपालिकाबाट ८४ जना, सुनवल नगरपालिकाबाट १०६ जना र बर्दघाट नगरपालिकाबाट साबै भन्दा धेरै १७८ जना रहेका छन् ।

वि.सं. २०४५ सालमा स्थापना भएको यो आँखा अस्पतालले सेवा विस्तार गुणस्तर अभिवृद्धि र नागरिकको पहँुच शुनिस्चित गर्ने कार्य निरन्तर गरिरहेको छ । पश्चिम नवलपरासीसहित पूर्वी नवलपरासीको विनय त्रिबेणी, रुपन्देही, कपिलवस्तु र भारतबाट समेत आउने सेवाग्राहीलाई सेवा दिँदै आएको अस्पतालका सूचना अधिकारी धिरेन्द्र कुमार साहानीले जानकारी दिनु भयो ।

उहाका अनुसार अस्पतालले सेभ फाउन्डेशन, डाक नेपाल लगायत अन्तर्राष्ट्रिय सहयोगी तथा विभिन्न संस्थाको सहकार्यमा नेपाल नेत्रज्योति संघको निर्देशनअनुसार गुणस्तरीय सेवा दिँदै आएको छ ।

अस्पतालबाट दैनिक रूपमा आँखा जाँच, ओपिडी सेवा, मोतियाबिन्दु, जलविन्दु, आँखामा मासु पलाउने, परेलाको समस्या लगायतका शल्यक्रिया तथा आकस्मिक सेवा, औषधि सेवा र निःशुल्क शिविरहरू सञ्चालन हुँदै आएका छन्।

साथै, विद्यालयका विद्यार्थीको आँखा परीक्षण, आवश्यकताअनुसार निःशुल्क चश्मा वितरण, शिक्षक तथा महिला स्वयंसेविकालाई प्राथमिक आँखा स्वास्थ्य सम्बन्धी तालिम र समुदायमा आँखा रोगसम्बन्धी जनचेतना फैलाउने कार्यक्रमहरू पनि सञ्चालन हुँदै आएको साहानीले बताउनु भयो ।

असपतालले अघिल्लो आर्थिक वर्ष २०८०।०८१ मा भने ३७ हजार ९१६ जनालाइ नियमिति ओपिडि सेवा प्रदान गरेको थियो ।