नवलपरासीमा एक बर्षमै १३ जना क्षयरोगीको मृत्यु  

पश्चिम् नवलपरासीमा एक बर्षमै १३ जना क्षयरोगि को मृत्यु भएको छ ।जिल्ला स्वास्थ्य कार्यालयको तथ्याङ्क अनुसार आर्थिक बर्ष ०८०/८१ मा १३ जनाको मृत्यु भएको छ ।

क्षयरोग पहिचान भै उपचारकै क्रममा मृत्यु भएको हो । मृत्यु भएका सबै वृद्धअवस्थाका व्यक्ति छन् ।मृत्यु हुनेमा ६५ देखि ८० बर्ष माथी उमेर समुहका ब्यक्तीहरु पनि रहेको र सबै भन्दा बढी प्रतापपुर गाउँपालिकामा रहेका क्षयरोगिको मृत्यु भएको स्वास्थ्य कार्यालय प्रमुख भेषराज शर्माले  जानकारी दिनु भयो ।

रोगिको ढिलो पहिचान हुँदा उपचारमा ढिलाई भएको कार्यालयले जनाएको छ ।जिल्लामा क्षयरोगीको उपचार दर ९३ प्रतिशत मात्र सफल भएकाले रोगीको पहिचान गरी समयमै उपचारको दायरामा ल्याउनुपर्नेमा सरोकारवालाहरूले जोड दिएका छन् ।

यहाँ हरेक वर्ष क्षयरोगीको संख्या बढ्दो छ । पछिल्लो ६ महिनामा २ सय १ जना नयाँ क्षयरोगी भेटिएको कार्यालयको तथ्यांक छ ।सबै भन्दा बढी रामग्राम र बर्दघाट नगरपालिकाका देखिएको छ।

पछिल्लो छ महिनाको अवधिमा गरिएको परीक्षणका क्रममा रामग्राम नगरपालिकामा ४३, बर्दघाट नगरपालिकामा ४२, सुनवल नगरपालिकामा ३३, सरावल गाउँपालिकामा २७, पाल्हिनन्दन गाउँपालिकामा २४, प्रतापपुर गाउँपालिकामा १५ र सुस्ता गाउँपालिकामा १५ जना रोगी भेटिएका छन् ।

क्षयरोगीहरूले जिल्लाका विभिन्न ६१ स्थानमा रहेको डट्स केन्द्रबाट औषधी खाइरहेका छन् । ग्रामीण भेगमा पुगेर शङ्कास्पद ब्यक्तिको जाचंगर्नेक्रम बढेपछि रोगीको संख्या पनि वर्षेनी बढ्दो रहेको छ ।

चालु आर्थिक वर्षमा पनि खोजपड्ताल कार्यक्रम संञ्चालन गरी ८ सय रोगी पत्ता लगाउने लक्ष्यको साथ काम भैरहेको स्वास्थ्य कार्यालयका प्रमुख भेषराज शर्माले बताउनुभयो ।

अहिले पालिकाहरुमा क्षयरोग खोजपडताल अभियान समेत चलाईएको छ ।समयमै उपचारमा नजाने नियमित औषधि सेवन नगर्ने जस्ता समस्या देखिएका छन ।१४ जना क्षयरोगीहरु स्वास्थ्य सस्थाको सम्पर्कमा न आएको कार्यालयले जनाएको छ ।