देवकोटा क्याम्पसका विद्यार्थीले देउसी भैलोबाट संकलित रकम दृष्टिविहिन विद्यार्थीको लागी खर्चिए

नवलपरासी पश्चिम्

पश्चिम नवलपरासीको सुनवलमा रहेको महाकवि देवकोटा क्याम्पसका विद्यार्थिहरुले देउसी भैलोबाट संकलन भएको रकमबाट दृष्टिविहिन विद्यार्थीहरुलाई सहयोग गरेका छन् । परासीमा रहेको आर्दश नमुना माविमा अध्ययनरत २२ जना दृष्टिविहिन बालबालिकालाई उनिहरुले न्यानो कपडा सहित दराज लगायतका समाग्री सहयोग गरेका हुन् ।

विद्यार्थीहरुले देउसी भैलो खेलेर संकलन गरेको रकममा क्याम्पसको स्रोत र क्याम्पसका संरक्षक लिलाधर सापकोटाको सहयोगमा रकम थप गरेर दुई लाख बराबरको समाग्री सहयोग गरेको क्याम्पसका अध्यक्ष कृष्ण प्रसाद लामिछानेले जानकारी दिनुभयो । विद्यार्थीहरुले हरेक वर्ष देउसीभैलो मार्फत रकम संलकन गर्ने र विभिन्न रचनात्मक कार्यमा उक्त रकम खर्च गर्दे आएका छन् ।

सो क्रममा पुर्वगृहराज्यमन्त्री देवेन्द्रराज कंण्डेलले दृष्टिविहिन विद्यार्थीको लागी छात्रावासको उचित व्यवस्थापन गर्नुपर्नेमा जोड दिनुभएको छ । उहाँले जनप्रतिनिधि भईसकेपछि जिम्मेवारी निर्वाह गर्नुपर्ने बताउदै आफु पराजित भएपनि जनताको म्यान्डेड अनुसार समाजिक कार्यमै क्रियाशिल रहेको उल्लेख गर्नुभयो । रामग्राम नगरपालिकाकि उपप्रमुख सम्झना चौधरीले दृष्टिविहिन विद्यार्थीको लागी आवश्यक व्यवस्थापन नगरपालिकाको तर्फबाट गर्ने प्रतिवद्धता व्यक्त गर्नुभयो ।

सो क्रममा जिल्ला सहकारी संघका अध्यक्ष विष्ण्ुा पौडेल, सुनवल वडा नम्बर ४ का वडा अध्यक्ष बालकृष्ण पंगेनी, आर्दश माविका व्यवस्थापन समितिका अध्यक्ष लक्ष्मण यादव, विद्यार्थी एलिसा बस्याल लगायतले समाजिक सेवाको कार्यमा सबै एकजुट बन्नुपर्नेमा जोड दिनुभयो ।

नवलपरासीमा आर्दश माविमा मात्र दृष्टिविहिन बालबालिकाको लागी अध्ययनको व्यवस्था रहेको छ । उक्त विद्यालयमा दृष्टिविहिन शिक्षकले नै उनिहरुलाई अध्यापन गराउदै आएका छन् ।