बिद्यार्थीहरुलाई गजल, गीत तथा चारु लेखन प्रशिक्षण

नवलपरासी,पश्चिम्

बर्दघाट प्रज्ञा प्रतिष्ठानले विद्यार्थीहरुलाई गजल, गीत तथा चारु लेखन सम्बन्धि प्रशिक्षण दिएको छ । फागुन २४ गतेदेखि सुरु भएको दुई दिने प्रशिक्षण कार्यक्रममा गजल लेखनका विविध पक्षबारे विस्तृत चर्चा गरिएको छ।

कार्यक्रममा बर्दघाट प्रज्ञा प्रतिष्ठानका कुलपति एब गजलकार डा. घनश्याम न्यौपाने परिश्रमीले गजल संरचना, बहरको महत्त्व, काफिया र रदीफको प्रयोगबारे सहजीकरण गर्नुभएको थियो। उहाँले “गजलका लागि काफिया मानवको लागी मुटु जस्तै हो भने बहर फोक्सोसरह हुन्छ” भन्ने धारणा व्यक्त गर्दै गजललाई प्रभावशाली बनाउन आवश्यक तत्वहरूबारे प्रशिक्षण दिनुभएको थियो। साथै, रविको प्रयोगले गजललाई थप बलियो बनाउन सकिने र रवि नहुँदा पनि गजल दमदार बन्न सक्ने तर त्यसका लागि सही संरचना आवश्यक पर्ने कुरामा उहाँले जोड दिनुभएको थियो।

बर्दघाट नगरपालिकाका नगरप्रमुख शम्भुलाल श्रेष्ठले नगरपालिकाले प्रज्ञा प्रतिष्ठानमार्फत भाषा, कला र साहित्यसम्बन्धी गतिविधिहरूलाई प्राथमिकताका साथ प्रवर्द्धन गरिरहेको बताउनु भएको थियो।साहित्य सिर्जनामा रुचि राख्ने विद्यार्थीहरूका लागि यो प्रशिक्षण प्रेरणादायी हुने श्रेष्ठले बताउनु भयो ।

प्रशिक्षणमा बर्दघाट नगरका सामुदायिक तथा संस्थागत ३७ वटा विद्यालयका शिक्षक तथा विद्यार्थीहरू सहभागी भएका छन ।