नवौं सुर्यनगर गोल्डकपको उपाधि वीरगन्ज युनाईटेडले हात पार्यो

लुम्बिनी प्रदेशकै दोस्रो ठूलो र नवलपरासी पश्चिमकै सर्वाधिक पुरस्कार राशी रहेको नवौं सस्करणको सुर्यनगर गोल्डकपको उपाधी बिरगंज युनाईटेड बिरगंजले हात पार्न सफल भएको छ ।बासबारी युवा क्लब काठमाडौलाई शुन्यका विरुद्ध एक गोलले पराजित गर्दै अन्ततः बिरगंज युनाईटेडले उपाधी उचालेको हो ।भने बासबारी क्लब काठमाडौ उपबिजेता बनेको छ ।

निकै आक्रामक र प्रतिस्पर्धात्मक खेलमा दोस्रो हाफको अन्तिम समयमा बिरगंजले गोल गर्न सफल भएको हो ।दोस्रो हाफको ८३ औं मिनेटमा बिरगंज युनाईटेडका जर्सी नम्बर ७ का सागर चौधरीले रोमाञ्चक गोल गर्दै उपाधी जिताउन सफल भएका थिए ।

पुरस्कार बितरण एवं खेल समापन सामारोहमा प्रमुख अतिथिको रुपमा बोल्दै लुम्बिनी प्रदेश सभा सदस्य बिश्वप्रेम पाठकले बर्दघाट नगरपालिका खेलकुदको उर्बर भुमी रहेको उल्लेख गर्दै दक्ष खेलाडी उत्पादनका लागि यो क्षेत्रमा फुटवल एकेडिमीको आवश्यकता रहेको बताउनु भयो ।खेलकुदकै माध्यम बाट आफ्नो क्षेत्र र समग्र राष्ट्रलाई नै बिश्वब्यापी रुपमा चिनाउने सकिने उल्लेख गर्दै सांसद पाठकले तिनै तहका सरकार मिलेर स्थानिय रुपमै खेलकुदको प्रवर्द्धन गर्नुपर्नेमा जोड दिनु भयो ।

बर्दघाट नगरपालिकाका नगरप्रमुख शम्भुलाल श्रेष्ठले बर्दघाट नगरपालिकाले सबै खेलकुदका बिद्यालाई समेटेर अघि बढेको उल्लेख गर्दै खेलकुदको बिकासबाट समृद्ध नगर निर्माणमा टेवा पुग्ने बताउनु भयो ।पछिल्लो समय खेकुदका क्षेत्रलाई समेत प्राथमिकतामा राखी नगरले लगानी गर्दै आईरहेको उहाँले बताउनु भयो ।