बन सम्बर्द्धन प्रणाली : पारिजात बनको रुख कटान सुरु

परिजात सामुदायिक बनले बन सम्वर्द्धन प्रणालीमा आधारित कटान शुभारम्भ गरेको छ । सामुदायिक बनले ८० वर्षका लागि १० वटा प्लट बनाएर १० वर्षमा कटान सक्नेगरी कार्ययोजना बनाएर काम गरिरहेको छ । कार्ययोजना लागुभएको ८ औँ वर्षमा ७ वटा प्लटमा पुन उत्पादनको काम भैरहेको छ भने ८ औँ प्लटमा कटान शुभारम्भ गरिएको हो ।

बर्दघाट नगरपालिकाका नगर प्रमुख शम्भुलाल श्रेष्ठले कटान कार्यको शुभारम्भ गर्दै निश्चित अवधि पछि उत्पादन क्षमता नभएका पुराना रूखहरू हटाउने र नयाँ बिरुवा उत्पादन गरी बनको व्यवस्थापन गर्नका लागि बन सम्वर्द्धन प्रणालीले महत्वपूर्ण भूमिका खेलेको बताउनुभयो । सामुदायिक बनले बनको संरक्षण र व्यवस्थापन सँगै उपभोक्ताहरूको माग र आवश्यकताको परिपूर्ति तर्फ पनि ध्यान दिन आवश्यक रहेको उल्लेख गर्नुभएको थियो । श्रेष्ठले पारिजात सामुदायिक बनले सुरु गरेको कम्पोस्ट मल उत्पादन हुनासाथ नगरपालिकाले किसानहरूलाई अनुदानमा उपलब्ध गराएर सहयोग गर्ने प्रतिबद्धता व्यक्त गर्नुभयो । सामुदायिक बनको हैसियत बिग्रेको बन क्षेत्र भित्र नगरपालिकाले फोहोर प्रसोधन केन्द्र सञ्चालन गर्नका लागि प्रकृयागत रुपमा अगाडि बढेकोमा सबैको साथ र सहयोगको खाँचो रहेको श्रेष्ठको भनाई रहेको थियो ।

कार्यक्रममा बर्दघाट सरावल सव डिभिजन बन कार्यालयका प्रमुख बलराम पोखरेलले बन सम्वर्द्धन प्रणालीबाटै बनको सही व्यवस्थापन हुन सक्ने बताउनुभयो । बनमा रूख कटान मात्र भयो भन्ने होइन एकपटक रूख कटान भएको प्लटमा ८० वर्षपछि मात्र कटान हुने भएकोले यसले बनमा रहेका पुराना रूखहरू हटाए नयाँ रूखहरूको जङ्गल बनाउन सहयोग पुग्ने बताउनुभयो ।

वडा नम्बर ४ का वडा अध्यक्ष वेधबिना तिवारीले सामुदायिक बनले रूख कटान पछि तारबार गरेर संरक्षण गरेको क्षेत्रमा बिरुवाहरू राम्रो सँग हुर्किरहेको देख्दा खुसी लागेको बताउनुभयो । सामुदायिक बनका अध्यक्ष कमानसिहं थापाले सामुदायिक बनले नियम सङ्गत रुपमाआफ्ना कार्यहरू अगाडि बढाइरहेको बताउनुभयो । बन सम्वर्द्धन कार्यक्रम अन्तरगत पुराना र वृद्धि विकास रोकिएका रूखहरू कटान गर्ने र नयाँ रूखहरू उत्पादन गरिने भएकोले यस विषयमा अनावश्यक तर्क वितर्क गर्न नहुने बताउनुभएको थियो ।