उखुको समर्थन मुल्य तोक्न कृषि मन्त्रीको ध्यानाकर्षण

नवलपरासी

उखु क्रसिङ सुरु हुँदासमेत मूल्य निर्धारण नभएको भन्दै उखु उत्पादक किसान समिति र कांग्रेस महान्त्री गगनकुमार थापासहितका प्रतिनिधीले सरकारको ध्यानाकर्षण गराएका छन् ।

नेपाल उखु उत्पादक महासंघ लुम्बिनी प्रदेशका अध्यक्ष एवं प्रतापपुर गाउँपालिकाका अध्यक्ष उमेशचन्द्र यादव, कांग्रेस लुम्बिनी प्रदेशका महामन्त्री विक्रम खनाल सहितको प्रतिनिधि मण्डलले काठमाडौ पुगेर उखुको मूल्य तत्काल तोक्न कृषिमन्त्री रामनाथ अधिकारीलाई ज्ञापनपत्र बुझाएको हो । किसानको लागत र बढ्दो महँगीको आधारमा यस वर्ष प्रतिक्विन्टल ७ सय १० रुपैयाँ न्यूनतम मुल्य तोक्नुपर्ने उनीहरुको माग छ ।

ज्ञापनपत्र बुझाउँदै नेपाल उखु उत्पादक महासंघ लुम्बिनी प्रदेशका अध्यक्ष उमेशचन्द्र यादवले २०७२ सालमा राष्ट्रिय बालीको रुपमा घोषणा गरिए पनि बर्सेनि मूल्य तोक्न ढिलो गर्ने र किसान मर्कामा परेको बताउनु भयो ।

ज्ञापनपत्र बुझ्दै कृषिमन्त्री अधिकारीले मंसिर १३ गते भित्रमा वैज्ञानिक आधारमा मूल्य तोक्ने आश्वासन दिनुभएको छ ।

समयमै मूल्य नतोक्दा किसानले चिनी उद्योग र भेली क्रसरलाई उधारोमा उखु बिक्री गर्न बाध्य छन् ।