काठमाडौँ । सरकारले आजबाट जग्गा धितो बन्धकी तथा रोक्का फुकुवा पूर्णरुपमा बैंक तथा वित्तीय संस्थाबाट सुरु गरेको छ ।
भूमि व्यवस्था सहकारी तथा गरिवी निवारण मन्त्रालयका अनुसार आजबाट बैंक तथा वित्तीय संस्थाबाट हुने धितो बन्धकीको कामलाई अनिवार्य अनलाइनबाट सुरु भएको हो ।
यो व्यवस्था कार्यान्वयनमा आएसँगै ऋण लिन वा चुक्ता गरेपछि जग्गा रोक्का र फुकुवा गर्न सेवाग्राही आफैँ मालपोत धाउनुपर्ने र बिचौलियालाई अतिरिक्त रकम बुझाउनुपर्ने बाध्यताको अन्त्य भएको छ ।
योसँगै आजबाट मालपोत कार्यालयबाट प्रदान हुँदै आएको धितोबन्धकी रोक्का फुकुवा सम्बन्धी सेवा अनलाइन प्रणालीमार्फत मात्र सञ्चालन भएको मन्त्रालयले जनाएको छ ।
नागरिकलाई छिटो, सहज तथा बिचौलिया-मुक्त सेवा पूर्वानुमानयोग्य समयभित्र उपलब्ध गराउने तथा सेवा प्रक्रियालाई मुहारविहीन, समयबद्ध (faceless, time-bound) र पूर्ण रूपमा डिजिटल बनाउने लक्ष्यअनुरूप यो व्यवस्था लागू गरिएको हो।
मन्त्रालयका अनुसार भूमि प्रशासन निर्देशिका, २०८१ को दफा ३९२ को उपदफा (४)बमोजिम बैंक तथा वित्तीय संस्थाबाट प्राप्त हुने धितोबन्धकी रोक्का फुकुवा सम्बन्धी कार्यलाई चरणबद्ध रूपमा डिजिटल प्रणालीमा रूपान्तरण गर्ने निर्णय गरिएको थियो ।
यसअनुसार तोकिएका बैंक तथा वित्तीय संस्थाबाट मिति २०८३ साल वैशाख २१ गते र अन्य क, ख, ग तथा घ वर्गका बैंक तथा वित्तीय संस्थाबाट आजदेखि उक्त सेवा अनलाइन प्रणालीमार्फत मात्र सञ्चालन आएको हो ।
सरकारले यस व्यवस्थाबाट सेवा प्रवाहमा पारदर्शिता, उत्तरदायित्व र समयबद्धता सुनिश्चित हुने विश्वास व्यक्त गरेको छ। साथै, यसले सेवाग्राहीलाई अनावश्यक झन्झट तथा बिचौलियाबाट मुक्त गर्दै डिजिटल सुशासन प्रवद्र्धनमा महत्वपूर्ण उपलब्धि हासिल हुने अपेक्षा गरिएको छ। यस कार्यले मालपोत कार्यालयहरुमा हाल रहेको सेवा चाप ६० प्रतिशतले कम हुने अनुमान गरिएको छ ।
