नवलपरासी (पश्चिम) । जेष्ठ नागरिक मुस्कान केन्द्रले ८० वर्ष उमेर पार गरेका ज्येष्ठ नागरिकहरूलाई सम्मान गरेको छ। समाजका अनुभवी र मार्गदर्शक व्यक्तित्वका रूपमा ज्येष्ठ नागरिकहरूलाई उच्च सम्मान गर्दै केन्द्रले बर्दघाट १५ मा एक कार्यक्रम आयोजना गरेको हो।
कार्यक्रममा नगरप्रमुख शम्भुलाल श्रेष्ठले ज्येष्ठ नागरिकहरू समाजका सम्मानित पात्र भएको उल्लेख गर्दै उनीहरूको अनुभव, ज्ञान र योगदानलाई राज्य तथा समाजले सदैव कदर गर्नुपर्ने बताउनुभयो। उहाँले ज्येष्ठ नागरिकका हकहित संरक्षणका लागि नगरपालिकाले विभिन्न कार्यक्रम सञ्चालन गरिरहेको समेत जानकारी दिनुभयो ।
नगरप्रमुख श्रेष्ठले ज्येष्ठ नागरिकका लागि भवन निर्माण गर्ने प्रतिबद्धता पनि व्यक्त गर्नुभयो। यस्तो भवनले ज्येष्ठ नागरिकहरूलाई भेला हुने, अनुभव आदानप्रदान गर्ने तथा विभिन्न सामाजिक गतिविधि सञ्चालन गर्ने अवसर प्रदान गर्ने विश्वास व्यक्त गर्नु भयो ।
कार्यक्रममा सहभागी ज्येष्ठ नागरिकहरूले मुस्कान केन्द्रले दिएको सम्मान र जमघट हुने बाताबरण तयार गरेको प्रति खुसी व्यक्त गर्दै आगामी दिनमा पनि आफ्ना आवश्यकता र अधिकारप्रति स्थानीय सरकारले ध्यान दिने अपेक्षा गरेका थिए।हरेक बर्ष जेष्ठ नागरिकका लागि विभिन्न कार्यक्रम गर्दै आईएको केन्द्रका अध्यक्ष दुर्गा उपाध्यायले बताउनु भयो ।
स्थानीय तहले जेष्ठ नागरिक मैत्री सेवाका लागि अवधारणा अघि सार्नु पर्ने सस्थाका सल्लाहकार मधुसूदन अर्यालले बताउनु भयो ।
बर्दघाट नगरपालिकाले ज्येष्ठ नागरिकको सम्मान, स्वास्थ्य सेवा तथा सामाजिक सुरक्षालाई प्राथमिकतामा राख्दै विभिन्न योजना अघि बढाउँदै आएको जनाएको छ।
